Trasélavi Alin Péters

Alin Péters, poèt é mizisyin Rényoné

 

 

 

Alain Peters

Alin Péters i vwa lo zour lo 10 mars 1952. Son Papa, Edouard Péters, zouèr la batri é la flit, té zwé dan lorkès kwiv té anméné par lo saxofonis Chane Kane. Li néna 13 zan, déza Alin i komans fé war son gouté avèk gitar dan lorkès Jules Arlanda épisa li rant dan lo kanal lorkès Bal. Konm bonpé mizisyin lépok, li apran lamizik aforstan ékouté. La fin zané soixant, la vag lo Rok i débark dann nout péi. La fin bann Bal, bann zène mizisyin wa lès sikoté lo séga é la varyété po pous zot zanpli afon kès é larg zot paroli kopyé si bann disk vinil i vyin ariv dan nout péi. Astèr, lo gitaris-santèr Alin Péters wa fé krak lo piblik avèk son pantalon a pwa, kan li sra si bann podiom. 

Larivé lo disko wa tinn bann lorkès bal vèr lané 1970, inndé mizisyin i sar tant zot sans péi la frans, mé po Alin Péters lapa kèsksyon li kit son Péi. Li wa lès sikoté bann kadans anglo-saxone po rod bann somin lé pankor frékanté lépok là, sat i mène la dékouvèrt in patrimwane mizikal lontan lésé dann fénwar.Maloya wa sort tipa tipa dann fénwar. Tou wa komans vèr lané 1976, dosou lo sinéma Royal Sinzozèf. Lo propriyétèr lo sinéma, Mésyé Chane- Kame Shu, té vé lans ali dan la prodiksyon lamizik, la li wa aménaz in lèstidyo lanrozistroman ousa in tralé bann zéne mizisyin i rod dot somin lamizik, anméné par René Lacaille. Nouri « des Beatles », li mélanz Hendrix avèk bann kadans séga é maloya é i swazi in non : Kaméléon. Anparmi nora Bernard Brancard, Hervé Imare, Zanklod Viadèr, Joël Gonthier é byinsir Alin Péters. Loy Erhlich wa rozoinn la band, é dot mizisyin ke zot non la rès dann fénwar...

Lèspèryans lo lèstidyo Royal i dir arpa lontan. Fini tout la nwit té pas po anrozistré dan lèstidyo, fini osi la fèt lalkol é zamal. La nésans son fiy, Amanda, Alin i sann trouv in frazil ékilib. Sra pèryod ousa li wa arèt bwar lalkol, li médit bonpé. Li té lir in tralé liv si Lindouisme. Li lavé komans ékrir bann tèsks an kréol vèr lané 1977 sikoté Lanzvin (SinZozèf), alor ke avan li té ékrir son bann fonnkèr an fransé dan lo stil Victor Hugo.

Ropo là i dir arpa lontan Loy i rovyin péi Larényon an 1979 é sokousi sra sikoté Létan Sinlé lo bann dalon wa rotrouv azot ousa wa nèt in group i sar fé in révolisyon mizikal : Karousèl « Lo group dé lo dépar i rod lo koté lidantité kréol mé san in démars militan » lo bann mizisyin Zoun i zou la flit é pèrkisyon, Joël Gonthier pèrkisyon osi, Loy èk klavyé, Alin Péters gitar é santèr néna osi Zanklod Viadèr, Téddy Batis, Bigoun, Tot, Kiki Mariapin, é lé zot mizisyin la tyinbo èk Karousèl. Lo group wa zwé bann konsèr malizé, minm si zot la zwé an promyé parti lo konsèr lo group Téléfone, Andan lo group wa ariv lo tan po romèt azot an koz. Alin Péters i arkomans boir bonpé, li wa tonb pli for dan lalkol apré la mor son Papa an 1980. Loy i arèt zwé lamizik avèk li, Péters i komans in lon somin dann malizé, loin minm son bann dalon ke la parti sikoté La Pointo-Sèl (Sinlé). 

Zan Mari Pirot, in lamontrèr ke i yinm lamizik, i propoz Alin Péters po anrozis son bann morso lamizik, minm dan lo malizé lalkol Pétèrs i kontini ékrir é konpozé son bann sanson dosi son takamba. In gadianm gitar i sort sikoté Lafrik ke Loy lavé anminm po li sikoté lo dézèr sahel an 1979. Zan Mari Pirot i di li lé té plis in mizisyin, Péters lé sirtou in poèt é li di sré domaz ke son bann sanson i rès dann fénwar. Li di in zour Pétèrs la ariv son kaz li la domand si i intèrès pa li anrozis son bann morso lamizik, sé konmsa li wa anrozis si in maniétofone kat pis na riyin avoir èk bann lèstidyo koméla é lé konmsa lo K7 ‘'Manzé po lo kèr'', lavi lo zour. Zot la travay zanviron in an, Péters té vyin sé Zan Mari gran matin. Sé Péters minm wa zwé tout lé bann zinstriman lamizik, li té fé lo bri èk ninport kosa, minm avèk in sak plastik ke li té frot dovan lo mikro po fé lo son kayamb.

Minm apré lo sorti son K7 ‘'Manzé po lo kèr'', Alin Péters wa kontinyé tonb dan lo malizé lalkol. Minm si li part an 1987 sikoté la frans po fé sony ali, in déplasman ousa li wa artrouv son dalon Loy sra lokazyon po anrozis détrwa morso lamizik, Péters wa artonb dan lalkol. Mé in ti lèspwar i vwa lo zour an novanm 1994, kan néna dan lèr romèt dobout lo group Karousèl lo tan po dé konsèr sikoté SinDni épisa Téat Sinzil. Po dé konsèr-là, Alin Péters i fé son gran rotour si in podiom, aplodi par bann piblik i lèv dobout po rann ali in lomaz. Dan in lanbyans lémosyon, lo gran poèt néna lo trak kan li sant Kaloubadya, Rès là Maloya sinonsa Vavang. Péters i arèt bwar é li fé sony ali lopital Sin Pol. Son bann lantouraz i èspèr in nouvo dépar lé posib. In prozé po anrozis avèk Loy i komans vwa lo zour. Mé lo kor Alin Péters lé fatigé. Inn kriz i akarpar ali an plin dan somin sikoté Sin Pol. Li désot lavi inn dézèr plitar sikoté Lopital lo 12 zilyé 1995, in swar Plène Line.

Po konèt promyé non Karousèl té Flèr Kann.

Rédaksiyon Kiltir Larénion

Rapèl po zot konèt :

* Tout roprodiksyon kopiaz, kiswa tèks, foto, fo domann lotorizasyon lo rèsponsab lo Sit Wèb.

Kiltir Larénion

Ajouter un commentaire

Vous utilisez un logiciel de type AdBlock, qui bloque le service de captchas publicitaires utilisé sur ce site. Pour pouvoir envoyer votre message, désactivez Adblock.

×