Dopi 1663 ziska 1848 i fé 185 an. Dopi 1848 ziska zordi i fé sèlman 162 zan. Larénion la viv 185 an dann lèsklavaz, sa lé lo pli gran bout dann son vi, si i kont po dé san.
Lèsklavaz i vé di aou konmsa : Lo ti pé domoun blan i gouvèrne en mèt, dosi tout domoun sak té zèsklav : Lo mèt la fé sak li lavé anvi ek lo zonm, lo zanfan, lo fanm noir : Kaf, malgas, malbar, sinon bann métis. Gro blan la vann zèsklav, li la asèp azot, li la fé maryé azot konm domoun koméla i mèt la truie ek lo mal. Li té fé tout sak li té vé èk bann ti fiy 11,12, 13 zan.
La zistis, la polis, la prizon, gouvèrnèr té èd bann blan fé sak zot lavé anvi ek lo zèsklav : Sèlman lo bann gro blan là, minm li té ‘'lib'' é li té gro blan là, gro blan an frans té i manz son kouraz èk son risès. La konpani dé zind é pisa la Répiblik té i pomp tankpirkipé tout sak navé Larénion : Kafé, dosik, poiv, kanèl.
Tout travay domoun té i fé Larénion po dévlop lo péi té i ansèrv pa aryin : Plis domoun té i travay, plis domoun té oki.
Lèsklavaz ek lèsploitasion kolonialis té anminn la gèr : Lo zèsklav té vé totos gouvèrnèr, lo gro blan ek gouvèrnèr té ansanm po totos lo zèsklav.
Ankor in not zafèr : Dann in sosiété konmsa là lo zèsklav té i kroi li té pa kapab fé rien. Li té vé totos lo bann gro blan, mé dan son kèr li té i di : Gro blan là lé lo diab, zamé ma giny règ zot kont. Lo gro blan son koté té i di : Zèsklav là, sa lé pa kapab fé aryin amoin minm lo Roi, sèlman i fo fé tansion bann kaf là.In zour bannna lé kapab vanzé.
LARÉNION AVAN LA PLANT KAFÉ
Lané 1663 dé fransé, inn té apel Louis Payen ek 10 malgas, 7 zonm ek 3 fanm, la débark Larénion. Zot té i sort Fort-Dauphin, dann pays Madégaskar. Tout suit la minm, lé 10 malgas la sov dann la foré, zot la parti maron.
Out 1664 lo Roi Louis XIV i done la konpani Dé Zind tou lo droi lo royome si bann mine, minièr, lor, larzan... minm lo droi fé lèsklavaz é dot droi itil dan L'Ile Bourbon. Dann tan là Larénion té i appel « L'Ile Bourbon ».
Out 1665 Etienne Régnault i ariv Larénion ek 20 kolon blan. In ti pé apré 20 malgas larivé. Domoun dan tan té i kroi i sava dévlop lo péi, é pi larèt sek. 50 tan konmsa, la paf é rien an plis. Lané 1713 na vé 538 blan lib ek 633 zèsklav sèlman.
Akoz la pa fé plis ke sa ?
Andébitan minm, zafèr tè i mèt dir : Lané 1666, 14 bato té doi anminn 1700 domoun Larénion. Tout lo zafèr la foiré : In moitié domoun la tomb malad, in moitié la rann zot trip ek maldémèr.
Isi minm la gèr la pèt bonpé foi : Band domoun la tié gouvèrnèr Vanboulon.
Dan lérop la gèr la pété ant lafrans é pisa zanglé, lotris, la oland, la gèr la komans lané 1638, la fini 1715.
In not zafèr ankor : Té i kout tro sèr po èsploit Larénion : Martinik, ek Gwadloup té pli pré.
Na vé poin asé larzan ek lor.Dann tan là na vé poin asé larzan ansanm lor laba dann Lérop.
Tout domoun i koné dan tan lontan lo pri in soulié, in kouto, dopin, sinonsa dot zafèr, té i kalkil, suivan lo kantité lor néna dann péi. Si la kantité lor i diminié, lo pri i sann. Si in boug i fé in lizine, in plantasion li va vand pli mèyèr marsé li té kroi, somanké li va pèrd larzan, alors li fé pa. Sa i appel ‘'la déflation'' pri i sann, travay na pi, domoun lé somèr, la kriz i totoss lizine,komèrs, travay bitasion.
Dann tan lontan an frans na vé in minis té i apèl Colbert : Colbert la di : ‘'i fo anpès lor, larzan, sort andéor ; i fo fé rant lo plis posib, i di pa dépans larzan Larénion''. Po sa minm la pa fé plis ke sa po dévlop nout péi.
Sa minm pandan 50 tan la pa fé rien dan nout péi !
Bann Gro Blan la konpani la ni okip Larénion ek in sèl zidé dan zot tèt, dépans lo moin posib, giny in grota larzan.
Larénion té doi fé zafèr : Plant zirof, kanèl, kafé, poiv, binzoin, po anvoy an frans.
Kan bato té sa va dann Lind, zot té sarz la viand, dori, maï, légim, in takon zafèr ankor isi Larénion.
Promié 50 tan, la plant rien, isi, sèlman la Konpani dé Zind lé té voras, rapas, vèy pa koman !
La Konpani té vé pa band kolon té sa la sas bèf, kabri, koson, torti, (torti sirtou lavé bonpé !).
Lané 1674, gouvèrnèr De La Haye la di konmsa : Band kolon na lo droi alé la sas, in sèl foi par sominn akoz la sas ‘'i ran lo noir parès !''
Koméla, domoun i koné, la pa po sa, sirtou akoz la konpani té vé anpli tout bato po li giny lo larzan.
Alé pa kroir bato la vé bezoin in ti pé manzé ! 5 bato la rès Larénion 4 moi lané 1711, zot la asté 252 bèf, 12 ti bèf, 175 mouton, 80 koson, 600 kok, 300 kanar maskarin, 100 zoi, 20 dind, 1500 torti.
Ankor in not zafèr la konpani té vé là : Li tou sèl na vé lo droi asté bann marsandiz Larénion, li tousèl na vé lo droi anminn sak kréol na vé bezoin konm dabitid : I asté bon marsé, i rovann pli sèr bann kréol té profèr fé lo maquillon ek lo bato zanglé.
Lo Sieur de la Hureek lo blan kivi.
Mésié de la Hure, gouvènèr là, té rosamb plis in bébèt ke in moun : li té trap in boug apré fé in zafèr défan, li tié lo boug. In zour, li la tié in boug anba la Ravine à Malèr, in zèsklav, in not zour li la tié in boug té i apèl Véron, akoz lo boug té vé pa èsploit bann kolon.
Li té asèt piè taba 3 sou ek bann plantèr, li té rovand 8 sou band marin. Li té mèt 5 sou dan son pos. Wit blan la sové, la parti dan la foré ek lo noir maron, la apèl azot kivi, sa in non malgas i vé di : Na plis lo kèr
La Hure la artourn an frans. Drouillard i ranplas ali. Li té plis pir ankor. 27 zanvié 1687, dé boug, François Mussard ek Jacques Fontaine la di ‘'nou va tié atoué. Drouillard la sié el la mas ; la mont dosi in bato, artourn an frans.
Randranor. Pé tèt akoz sa minm lo noir té pa tro maltrété !
Pa bézoin kroir lo noir té égal ansanm band blan.
1) Lo Pèr Foudre té i di an 1671 : ‘'Marie-Anne, négrès'' i marié ek ‘'Antoine nèg'' ! Li té i di ankor : Noir là, sa band ‘'Idolâtres'', ‘'Infidèles''...
2) Lané 1674, Mésié de La Haye la défann maryaz antr noir ek blan : ‘' Défenses aux blancs d'épouser des négresses, cela les dégoûterait du service. Défense aux noirs d'épouser des blanches : C'est une confusion à éviter.''
3) Lané 1687, moi mé, lo ‘'très - Révérand Père Domingue de la Conception'' la vand ‘' à Gaspard Lautret in zèsklav néna 12 zan i apèl Fransoi''. Fransoi té in ti marmay malbar.
4) Lané1690 la komans mèt lo mo zèsklav si lo rézis-batème. Dopi 1690, la komans fé nir bann zèsklav par kantité. Té pi la pène apèl azot ‘'domeqtiques''.
Noir té maléré,
Kaf té mizèr.
Si ou vé koz lèsklavaz isi Larénion, ou bit si dé kalité domoun : In promié kalité i di : ‘'La vi té gayar dann tan là'', in dézième kalité i di : ‘'mié vo lanfèr ‘'
Promié kalité i di :
1) lo zèsklav té in krétien, na vé in lam, li té manz losti, li té pran tout sakréman. Li té sa va katésis. Té i fo li maryé : Bondié i vé pa domoun i rès an ménaz.
2) Lo Prèt na vé in kaz, in ti bout latèr, in zèsklav po travay po li.
3) Lo mèt té in boug, vèy pa koman po son zèsklav. Boug té i apèl Henri Mollet ‘'prenait grand soin de bien conduire ses noirs. ‘'
Dézième kalité i di :
Tousala, la pa lo pli vré ! lo pli vré, sé sa :
1) Ou trap domoun par la fors ek fizi, ou i fé sort ali la ba, ou fé vomi ali tout son trip dann bato. Li wa pi zamé son fami. Sa minm promié krim.
2) Antoine Boucher i di konmsa : In mèt té i bril ‘'les femmes toutes vives, et les renvoyaient qui malades qu'elles mouraiet, car ce sont d'ordinaire les lieux que la pudeur ne permet pas de dire que l'on s'attache à bruler''. Lo minm boug té i done son koson ti zanfan noir po manzé.
3) 23 sèktanm 1704, dé blan la sine in kontra :
M.X ‘'ayant une négresse Isabelle Moine, agée de 20 ans,'' i done la fiy M.Y'' pour qu'il l'accouple à l'un de ses noirs, Maximin, agé de 22 ans. En retour, X recevra une petite négresse agée de six ans et les deux premiers enfants qui naîtront à terme et vivants.''
Zordi in plantèr i prèt son verrat, po mèt ek inn trui, li giny in ti.
4) la zistis té parèy po lo blan ek po lo noir.
3 mars 1705 in zèsklav bouro la koup lo zaré in zèsklav
3 sektanm minm lané la koup lo pié in not zèslav.
‘'En leur coupant le pied, soit la jambe, cela les empêches de s'envoler et ils n'en rendaient pas moins bon service à leur maître.''
- 24 zanvié 1723, Zozèf Mitèf ‘'Coupable d'inpiété, d'avoir levé la main sur un blanc, a été pendu et étranglé jusqu'à ce mort s'en suive, son corps jeté sur un bucher pour y être brulé et les cendres disperséees au vent...''
Blan blan té van azot kome zanimo, zot té i fé tout travay sak té i fatig plis, té fé mèt azot ansanm po fé zanfan. La zistis té sèvèr : Bann zèsklav té maléré. In bonpé té siport zot sor, in pé té sava maron. Zot té i sié avèk, zot té i sar kasièt dann boi.
Dépi an débitan minm, lané 1663, dis Malgas la sov dann boi : Promié lariv isi, li minm promié maron. Par la suit tazantan bann noir té sava maron : Défoi, inn tousèl, souvan défoi par kantité.
Dan la foré, maron té i kiltiv latèr : Zot té bril in bout la foré, té i plant maniok, patat, sansa maï. Zot té i manz mang, goyavié, goyav.Zot té i suiv mousa miel po ramas domiel. Zot té i viv an bon ménaz èk zot fanm, zot zanfan, zot na vé zot Sèf, zot gouvèrnnman. Kan la nui té i tonb, bann granmoun té i rakont zistoir Lafrik, Lind, Madégaskar, zot té zoué Bob, Kayamb, Banzo, Flit goyav. Lèspri la nui lété là, lo blan lété loin, lavi té gayar.
Tazantan, zot té i désann po vanz in kou dosi bann blan é pi po rod dosèl, fizi, la poud, kartous, la toil. Lo blan té i mont an band po tié maron dann boi.
Poèt kréol Lacaussade la bien rakont sa dan son poèm dési Anchain :
‘' Il préférait la lutte incertaine et sauvage,
A des jours plus cléments passés dans l'esclavage,
Et debout sur ces monts qu'il avait pour témoin,
Souvent, il s'écriait : ‘'Je suis libre du moin !''.
La zistis té féros po in zèsklav maron, si té souk a li, akoz in zèsklav té kout sèr : La moitié lo pri in kaz kréol po rès dodan !
Lané 1723, bann blan la di : Si in noir i sava maron, si trap ali :
-Promié foi i mark ali èk in fèr rouz so.
-Dézièm foi, i koup son zaré ou son zanb.
-Troizièm foi i koup son kou. Bann blan i asosié po done in ot zèklav lo pov mèt sinistré (sak la pèrd son zèsklav).
Ala mové pasaz listoir Larénion, dann tan lèsklavaz lo pli gran krim kont limanité...
Rédaksion: Kiltir Larénion
