Isi Larénion «Kréol » i vé di in moun, sansa in zafèr i rant dann gran ron la kréolité.
Dan la lang kréol rénioné, mo « Kréol » la, i sinial tout bann rénioné ansanm. Porézon, bann Morisien, èk Rodrigé i ansèrv ali dan in sans pli séré par rapor Larénion.
Kréol, épisa kréolité lé mayé ansanm, minm si souvandéfoi néna désèrtin kréol i prétan pa viv zot kalité kréol, i vé touf ali.
Parlfèt, rénioné aou, Morisien aou, Rodrigé, Séséloi, Gwadloupéin, Martiniké, tout i partaz in ta zafèr dan lo gran ron kréol.
Kréolité là, i trouv ali bonpé landroi lé alinié dosi somin ousa té saroy zèsklav po fé trafik ansanm ; épisa partou là, kisoi monitèr la lang, kisoi mazinasion, tout i tomb in pé parèy.
Par lo manièr domoun i rès dan péi la, i anminm zot sosiété, zot manir viv, zot i tomb konm i di famiy : Si i rogard bien, in zafèr konmsa i tomb plito rar. I fo rod lontan si la tèr po trouv lo minm zafèr.
Anpliskésa, lavé pa bézoin zot i rankont inn é lot po tousa nasion là i tomb kaziman parèy dan zot tournéviré : Sak la fé la baz kréolité là, sé in sèl fason zot la bati zot pèp, in minm kadans listoir. Apar tout péi là i koné kosa i vé di kolonizasion dan zot listoir. Tout koin dizon Zantiyé, sinonsa Maskarinn, néna son prop kalité.
La poin bonpé kiltir la giny mèt ansanm si la tèr kaziman tout lèspès domoun i trouv, dann mounité. Po sa minm, Rénionité là lé konmidiré inn piès dan lo gran kaz la kréolité.
Kiltir Larénion
Group Kiltir Larénion é Kiltirèl
