Kréolité, Rénionité, sa minm la ansèrv siman po fé grandi lo pèp Larénion.
Domoun té sort Lafrik, Lérop, Madagascar, Lind, Lazi, la rozoinn inn né lot, la mélanzé, la abit inn si lot, po fé lèv inn.
Tout kalité domoun la mélanzé, listoir la anminn azot ziska tèr la.
Ala troi sièk èk in bout, in kalité domoun nèv la zèrmé ; la anfons son rasine, la pousé dan lo mond là. Kisoi la ras, kisoi la lang, rolizion sansa manièr maziné, manir viv, tout lété ègzilé poudbon. Parlfèt li rod in not vi, si inn not tèr, tout i tomb nèv parèy.
Kréolité sanm rénionité tou lé dé i sort dan vant volkan là.
Nadkou, nana in pé i tant rogard in bèl tanponaz konmsa là aryink èk in sèl lèz nout rénionité, kisoi Lafrik, Lind, Lazi sinonsa Lérop.
Alé war, po li giny son figir koméla, la rénionité la dobouté dann santiman san finision ; si in bor li la di oui, si lot bor li la di non.
Si in bor li tomb zèsklav, si lot bor, li la parti maron.
Li giny pa sanpasé poz kesksion, si ou vien la aryink po bat karé, sinonsa aryink po vèy flèr fantézi, ou rès babane.
Soman in mélanz an zobok konmsa i fé pèr détroi po sa minm zot la rod sèk ali bor laba. (zot i rogard Lérop, sansa Lafrik, sansa Lind). Zot i rod in plas bordaz dan in kiltir lontan- lontan minm, èk inn loi, in règloman. Alé war dan kréolité, rénionité là, rénioné lé anlèr, sinpléman zot i koné pa.
Manièr kréolité là lé fine ariv loin dovan, mélanzaz kiltir lé parlfèt in lansor po la rénionité.
Rédaksion Kiltir Larénion - Paz Listwar Larényon
